ಸುತ್ತಲಿನ ವಿದ್ಯಮಾನಗಳ ಕುರಿತು ಜನಮಾನಸದಲ್ಲಿ ಮೂಡುವ ಅಭಿಪ್ರಾಯಗಳು ಆಖ್ಯಾನ (ನೆರೇಟಿವ್) ಗಳಿಂದ ಪ್ರಭಾವಿತವಾಗುತ್ತವೆ. ಅಂತೆಯೇ ವಿದ್ಯಮಾನಗಳು ಆಖ್ಯಾನಗಳು ಹುಟ್ಟುಕೊಳ್ಳುವುದಕ್ಕೂ ಗಟ್ಟಿಯಾಗುವುದಕ್ಕೂ ಕಾರಣವಾಗುತ್ತವೆ. ಅಂತಹ ಕೆಲವು ಸಮಕಾಲೀನ ವಿಷಯಗಳ ಕುರಿತ ಆಖ್ಯಾನಗಳನ್ನು ಪರಾಮರ್ಶಿಸುವ ಪ್ರಯತ್ನವನ್ನು ’ಆನ್ವೀಕ್ಷಿಕೀ – ಸಮಕಾಲೀನ ಆಖ್ಯಾನಗಳು’ ಪುಸ್ತಕ ಮಾಡಿದೆ. ಸುರಾಜ್ಯ, ಇಸ್ಲಾಮಿನ ಅರ್ಥೈಸುವಿಕೆ, ಸಾಮಾಜಿಕ ಸಾಮರಸ್ಯ, ಪರಿಸರ ಸಂರಕ್ಷಣೆ, ನವಚಳವಳಿಗಳು, ಪ್ರಾದೇಶಿಕತೆ ಮತ್ತು ರಾಷ್ಟ್ರೀಯತೆ ಈ ವಿಷಯಗಳನ್ನು ಆಖ್ಯಾನಗಳ ಹಿನ್ನೆಲೆಯಲ್ಲಿ ಲೇಖಕರು ಕೂಲಂಕುಷವಾಗಿ ವಿವಿಧ ಮಗ್ಗುಲುಗಳಿಂದ ವಿಶ್ಲೇಷಿಸಿದ್ದಾರೆ. ರೋಹಿತ್ ಚಕ್ರತೀರ್ಥ, ಡಾ ಶ್ರೀಧರನ್, ಚಂದ್ರಶೇಖರ ಜಹಗೀರ್ದಾರ್, ರೋಹಿಣಾಕ್ಷ ಶಿರ್ಲಾಲು, ಎಸ್ ಗಿರಿಜಾಶಂಕರ ಇವರಗಳು ಬರೆದ ಪ್ರಬಂಧಗಳು ಈ ಸಂಕಲನದಲ್ಲಿದ್ದು, ಆರೆಸ್ಸಸ್ ಪ್ರಚಾರಕ ಪ್ರದೀಪ ಮೈಸೂರು ಅವರು ಪುಸ್ತಕಕ್ಕೆ ಮತ್ತು ಆಖ್ಯಾನಗಳ ಪ್ರಪಂಚಕ್ಕೆ ಅರ್ಥವತ್ತಾದ ಪ್ರವೇಶಿಕೆಯನ್ನು ಬರೆದಿದ್ದಾರೆ. ಆನ್ವೀಕ್ಷಿಕೀ ಅಂದರೆ ನಿರೂಪಿತ ವಿಷಯದ ಪುನರ್ಮನನ ಎನ್ನುವ ಅರ್ಥವಿದೆ. ಪರಂಪರೆಯಲ್ಲಿ ಈ ಶಬ್ದವು ವಿಶೇಷವಾಗಿ ನ್ಯಾಯ ದರ್ಶನಕ್ಕೆ ಅನ್ವಯವಾಗುತ್ತದೆ. ರಾಜನಾಗತಕ್ಕವನು ಕಲಿಯಬೇಕಾದ ನಾಲ್ಕು ಸಂಗತಿಗಳಲ್ಲಿ ’ಆನ್ವೀಕ್ಷಿಕೀ’ ಕೂಡ ಒಂದು ಎಂದು ಚಾಣಕ್ಯನ ಅರ್ಥಶಾಸ್ತ್ರದಲ್ಲಿ ಹೇಳಿದೆ. (ವಾರ್ತಾ, ತ್ರಯೀ, ದಂಡನೀತಿ – ಇವು ಉಳಿದ ಮೂರು). ಇದನ್ನು ಮನನ, ಪರಾಮರ್ಶೆ ಎಂಬ ಸಾಮಾನ್ಯ ಅರ್ಥದಲ್ಲಿ ಈ ಪುಸ್ತಕದ ಶೀರ್ಷಿಕೆಯಾಗಿ ಬಳಸಲಾಗಿದೆ.